Атайҙар, ситтә ҡалмағыҙ!

Башҡортостанда 15 апрелгә тиклем “Атай батырлығы” йәмәғәт наградаһы өсөн икенсе конкурсҡа ғаризалар ҡабул ителә. Уны республиканың Йәмәғәт палатаһы ойоштора. Һәр муниципалитеттан унға тиклем ғариза ҡабул ителә. Сара Башҡортостанда былтыр февралдән үткәрелә башланы.

Балалыҡты, әсәлекте яҡлау өлкәһендә наградалар күп, ә был - республикала атайҙар өсөн булдырылған тәүге награда. Тик ыңғай миҫалдарҙа ғына ғаиләнең ҡиммәтен күрһәтергә, киләсәк быуынды тәрбиәләргә мөмкин. Награда атайҙар баһаһын күтәргән, ғаилә ҡиммәттәрен һаҡлау өсөн шарттар булдырған, сәләмәт тормош алып барған, муниципалитет тормошонда әүҙем ҡатнашҡан ир-атҡа бирелә.

Бүләккә кемдәр дәғүә итә ала? Башҡортостанда кәм тигәндә биш йыл йәшәгән, балаларына яҡшы тәрбиә биргән, ул-ҡыҙҙары тормошта ҡаҙаныштарға өлгәшкән, батырлыҡ күрһәткән ир-ат уға һис һүҙһеҙ лайыҡ.

“Конкурс комиссияһы атайҙарҙың бала тәрбиәләүҙәге шәхси өлөшөн баһалаясаҡ йәки балаларҙың уңышын ҡараясаҡ. Бында һүҙ юғары етештереү, спорт, ижади йәки башҡа күрһәткестәргә өлгәшкән, шулай уҡ ҡаһарманлыҡ өсөн дәүләт наградаларын алғандар тураһында бара”, - тине конкурсты ойоштороусылар.

Наградаға тәҡдим итеүҙә Ватанды яҡлағанда һәләк булған йәки хәбәрһеҙ юғалған, хәрби, хеҙмәт йәки гражданлыҡ бурысын үтәгәндә һәләк булған, йәки йәрәхәтләнгән балалар ҙа иҫәпкә алынасаҡ.

”Атай батырлығы”на лайыҡлылар һеҙҙең коллективта бар икән, ашығығыҙ, награданы юллау өсөн Йәмәғәт советына йәки ғаилә йәшәгән муниципалитетҡа мөрөжәғәт итегеҙ. Награда материалдары электрон йәки ҡағыҙ рәүешендә Йәмәғәт палатаһы Аппаратында 15 апрелгә тиклем ҡабул ителә. Һорауҙарығыҙ менән ошо телефонға шылтыратығыҙ: 8-347-280-82-36.

Йәмәғәт палатаһына килгән барлыҡ материалдар Конкурс комиссияһына тапшырыласаҡ, улар 14 майға тиклем тикшерелеп, кандидатуралар Йәмәғәт Палатаһы Советына ҡарау өсөн сығарыласаҡ.

Яҡынса билдәләнеүенсә, еңеүселәрҙе бүләкләү Атайҙар көнөндә буласаҡ (20 июнь). Әйткәндәй, былтыр конкурсҡа 106 ғариза килгән. Һөҙөмтәлә 27 атай бүләкләнде.

Фото: Йәмәғәт палатаһы сайты.