15 апрелдән үк сыға аласаҡбыҙ

Әгәр һауа торошо уңайлы булһа, техника баҫыуҙарға 15 апрелдән үк сыға аласаҡ.

15 мартта Хөкүмәттә үткән оператив кәңәшмәлә Башҡортостан Хөкүмәте вице-премьеры – ауыл хужалығы министры Илшат Фәзрахманов быйылғы яҙғы сәсеү эштәренә әҙерлек тураһында һөйләне. Уның белдереүенсә, быйыл сәсеү майҙаны 3 миллион гектар тәшкил итәсәк. 2021 йылда Башҡортостан аграрийҙары иген һәм ҡуҙаҡлы культуралар уңышын 4,5 миллион тоннаға, уртаса уңышлылыҡ кимәлен – гектарынан 23,5 центнерға тиклем еткерергә планлаштыра.

Вице-премьер белдереүенсә, Башҡортостан сәсеү кампанияһына әҙер. Совет осоронан алып беренсе тапҡыр республиканың ауыл хужалығы предприятиелары иҫкереү арҡаһында иҫәптән сығарыуға ҡарағанда, яңы техниканы күберәк һатып алыуға өлгәшкән. Әгәр һауа торошо уңайлы булһа, техника баҫыуҙарға 15 апрелдән үк сыға аласаҡ. Трактор паркы һәм махсус машиналарҙың әҙерлек кимәле бөгөндән 90 процентын тәшкил итә. Уларға 3 миллион гектар майҙанды эшкәртергә кәрәк.

Муниципалитет башлыҡтарына мөрәжәғәт итеп, Илшат Фәзрахманов 31 районда дөйөм алғанда 300 мең гектарлыҡ файҙаланмаған һөрөнтө ерҙәр бар тине. Был күрһәткес буйынса Мишкә, Борай һәм Балаҡатай райондары алдынғы урындарҙа. Был ерҙәрҙе лә әйләнешкә индерер кәрәк.

Республикаға сәсеү өсөн 289 мең тонна орлоҡ кәрәк, ул тулыһынса әҙер. 5 мартҡа ҡарата 115 мең тонна ашлама әҙерләнгән, был пландың 60 проценты. Дизель яғыулығы запастары 10 мең тонна тәшкил итә. Эштәр башланғансы ул 40 мең тоннаға тиклем етергә тейеш.

Сәсеү кампанияһы өсөн 16,3 миллиард һум аҡса талап ителә. Төп сығанаҡ булып предприятиеларҙың үҙ килеме, ҡыҫҡа ваҡытлы ташламалы кредиттар һәм дәүләт ярҙамы торасаҡ. Яҡын арала райондарҙа зона аграр конференциялары үтәсәк.

– Беҙ сәсеү кампанияһына еңел булмаған финанс шарттары менән инәбеҙ. Тәбиғәт беҙҙең яҡта булыр тип ышанайыҡ. Ауыл хужалығы тармағы эшсәндәренә уңыштар теләйек, – тине Радий Хәбиров.

Фото: iuldash.rbsmi.ru

Автор: Альфия Мингалиева

https://bash.rbsmi.ru/articles/i-tisad/Be-s-se-g--er-716807/

Читайте нас: